Fréttasafn

Aðalfundur Norðurorku hf. var haldinn föstudaginn 22. mars í Menningarhúsinu Hofi og var dagskrá í samræmi við samþykktir félagsins. Rekstur Norðurorku gekk vel á árinu 2012. Ársvelta samstæðunnar var rúmlega 2,7 milljarðar króna. Hagnaður ársins var 710 milljónir króna, eftir skatta og eigið fé tæplega 5,8 milljarðar króna.

Í síðustu viku var sjónvarpsfólk frá þýsku ríkissjónvarpsstöðinni ARD statt í Grímsey við tökur á heimildaþætti um þorp og bæi við heimskautsbaug. Auk þess að taka upp efni í Grímsey er förinni heitið til Rússlands, Finnlands, Noregs, Svíþjóðar og Grænlands. Þættirnir munu fræða áhorfendur um sögu, vísindi, landslag og lifnaðar- og atvinnuhætti staðanna.

Græni hatturinn er fyrir löngu orðinn einn þekktasti tónleikastaður landsins enda boðið upp á fjölbreytta og metnaðarfulla dagskrá. Það sama verður uppi á teningnum alla páskana þar sem haldnir verða tónleikar öll kvöld. En um helgina verður það hljómsveitin Valdimar sem leggur Græna hattinn undir sig og heldur þar tvenna tónleika, þá fyrri í kvöld, föstudagskvöld, kl. 22.00 og hina seinni annað kvöld kl. 22.00. Hljómsveitin gaf út plötuna Um stund fyrir síðustu jól sem hlaut góðar viðtökur bæði gagnrýnenda sem og plötukaupenda.

Mikil stemning hefur ríkt í Grímsey í marsmánuði þar sem karlmenn eyjarinnar hafa keppst við að safna yfirvaraskeggi í tilefni af Mottumars, árlegu átaki Krabbameinsfélagsins. Kiwanisklúbburinn Grímur tekur þátt í átakinu annað árið í röð og inn á vefsíðu átaksins, mottumars.is, má sjá árangur kappanna. Klúbburinn heitir eftir Grími nokkrum sem talinn er hafa verið fyrstur manna til að reisa sér bú í eyjunni. Auk þeirra félaga eru 14 einstaklingar skráðir til leiks í Grímsey og því mikil gróska í skeggsöfnun þeirra Grímseyinga.

Nokkur snjókoma var á Akureyri í nótt og er spáð ennþá meiri ofankomu í kvöld og nótt. Næstu daga er spáð köldu veðri og ef til vill einhverjum éljagangi en ekki miklum vindi. Það má því segja að nú sé verið að safna snjó á skíðasvæðið í Hlíðarfjalli fyrir páskana og einnig er allt útlit fyrir að næsta helgi verið skíðafólki afar góð.

Leikfélag Akureyrar stendur fyrir málþingi á næstkomandi fimmtudag kl. 20.30 um mannréttindamál. Málþingið ber yfirskriftina „Hver er kaktusinn í okkar samfélagi“ og er haldið í kjölfarið á sýningunni “Kaktusinn” sem nú er á fjölum Samkomuhússins. Þátttakendur málþingsins eru lögfræðingarnir Katrín Oddsdóttir og Aðalheiður Ámundadóttir ásamt Evu Maríu Ingvadóttur. Almennur félagsfundur LA verður haldinn á undan málþinginu og hefst kl. 19:30 en þar verður leikárið 2013-14 kynnt fyrir félagsmönnum.

POWERtalk samtökin eru alþjóðleg samtök sem þjálfa fólk í að koma fram og koma fyrir sig orði opinberlega. Nú stendur til að endurvekja starf samtakanna á Akureyri og bjóða markvissa þjálfun í ræðumennsku og fundarstjórn svo fátt eitt sé nefnt. Þetta gagnast öllum þeim sem vilja koma skoðun sinni á framfæri. POWERtalk eru mannræktarsamtök þar sem allir geta fengið þjálfun á eigin forsendum og á þeim hraða sem þeir kjósa.

Í dag undirrituðu Þórgnýr Dýrfjörð framkvæmdastjóri Akureyrarstofu og Jón Gunnar Þórðarson leikstjóri samning um að sá síðarnefndi hafi verkstjórn á Akureyrarvöku 2013 í samvinnu við starfsfólk Akureyrarstofu. Hátíðin verður sem fyrr haldin síðustu helgina í ágúst eða sem næst afmæli bæjarins sem er 29. ágúst.

Atvinnu- og nýsköpunarhelgin 2013 fer fram á Akureyri helgina 5. til 7. apríl. Tilgangurinn er að hjálpa einstaklingum eða fyrirtækjum að koma hugmyndum sínum í framkvæmd og á framfæri við rétta aðila. Fjölmörg fyrirtæki og aðilar af svæðinu styðja rausnarlega við viðburðinn í samstarfi við Akureyrarstofu en Innovit, nýsköpunar- og frumkvöðlasetur sér um framkvæmdina í samvinnu við Landsbankann.

Helgin framundan er svokölluð skiptihelgi hjá skíðasvæðunum á Norðurlandi. Það þýðir að á laugardag og sunnudag geta þeir sem eiga vetrarkort á einu af samstarfssvæðunum, fengið dagskort á fjórum öðrum svæðum gegn framvísun kortsins. Er þetta liður í að auka samstarf skíðasvæðanna á Norðurlandi.

Menningarverðlaun DV voru afhent í 34. sinn í Iðnó í Reykjavík í dag. Verðlaunin voru veitt í 9 flokkum, þar á meðal fyrir arkitektúr og hlaut akritektastofan Kollgáta á Akureyri verðlaun fyrir kaffihúsið í Lystigarðinum, Café Björk, en verkkaupi var Akureyrarbær. Dómnefnd skipuðu Helgi Steinar Helgason arkitekt FAÍ formaður, Borghildur Sölvey Sturludóttir arkitekt FAÍ og Baldur Ólafur Svavarsson arkitekt FAÍ.