Fréttasafn

Meirihluti útlendinga á Akureyri er ánægður með veru sína í bænum. Þeir sem koma frá löndum utan Evrópu eru ánægðastir en minnst er ánægjan meðal fólks frá Austur-Evrópu. Þá eru erlendar konur almennt með meiri menntun en karlar og duglegri við að tileinka sér íslenskuna. Þetta er meðal þess sem fram kemur í rannsókn þeirra Kjartans Ólafssonar lektors og Markusar Meckl prófessors við félagsvísindadeild Háskólans á Akureyri.

Síðasta sýningaropnun ársins í Sjónlistamiðstöðinni verður laugardaginn 2. nóvember kl. 15 þegar Guðbjörg Ringsted og Rannveig Helgadóttir opna sýninguna Mandala / Munstur í Ketilhúsinu.

Gönguskíðabrautin í Hlíðarfjalli, hin svokallaða Vetrarbraut, verður formlega opnuð seinnipartinn í dag. Bæjarbúar urðu vitni að því í gærkvöldi að flóðljósin við brautina voru tendruð en þá var verið að birtustilla kastarana og kanna aðstæður. Spáð er éljagangi en Guðmundur Karl Jónsson, forstöðumaður í Hlíðarfjalli, telur engar líkur á að veður spilli útiveru og ánægju gönguskíðafólks.

Halldóra Eydís Jónsdóttir skóhönnuður heldur fyrirlestur í stofu M01 í Verkmenntaskólanum á Akureyri föstudaginn 1. nóvember kl. 15. Halldóra Eydís er fædd og uppalin í náttúruperlunni Mývatnssveit. Hún lærði myndlist og hönnun í VMA áður en hún hélt til London í skóhönnunarnám.

Uppátækjum Hymnodiu eru engin takmörk sett. Nú fer kórinn um Eyjafjörð og Þingeyjarsýslur með fjölbragðadagskrá, syngur, spilar á alls kyns skrýtin og skemmtileg hljóðfæri, hefur uppi glens og grín, leikræn tilþrif og jafnvel dans ef vel liggur á. Jóðlandi sálfræðingurinn, drynjandi geðlæknirinn, fljúgandi Hollendingurinn, sænski grunnskólakennarinn, lagvissi lögfræðingurinn, tölvuóði trompetleikarinn og margir fleiri koma fram.

Laugardaginn 2. nóvember kl. 14.00 opna fjórtán nemendur af Fagurlistadeild Myndlistaskólans á Akureyri sýningu í Populus tremula í Listagilinu. Nemendurnir sýna afrakstur áfanga undir handleiðslu Hlyns Hallssonar myndlistarmanns um fjölfeldi í hinni fjölbreyttustu mynd eins og þrykk, ljósrit, bækur, sprey, stensla, hluti, ljósmyndir og hvað eina.

Lagnafélag Íslands veitti Menningarhúsinu Hofi, hönnuðum og iðnaðarmönnum sem unnu við byggingu þess, viðurkenningar fyrir "Lofsvert lagnaverk" árið 2012. Forseti Íslands, Ólafur Ragnar Grímsson, afhenti viðurkenningarnar við hátíðlega athöfn í Hofi í gær.

Ný ostalína MS á Akureyri verður vígð í dag. Undirbúningur fyrir kaup á nýrri vinnslulínu og breytingar á húsnæði hófst fyrir rösku ári. Með nýju línunni aukast afköstin til muna. Kristín Halldórsdóttir mjólkurbússtjóri segir um að ræða gríðarstórt framfaraskref í ostagerð hjá fyrirtækinu. Áætlaður kostnaður við breytingarnar er um einn milljarður króna.

Krabbameinsfélag Akureyrar og nágrennis fékk í gærkvöldi afhentan 900 þúsund króna styrk frá aðstandendum Dömulegra dekurdaga. Dömulegir dekurdagar eru árlegur viðburður sem haldinn er um miðjan október og í fyrra hófst samstarf við Krabbameinsfélag Akureyrar og nágrennis sem felst í því að skipuleggjendur framleiða handþrykkta taupoka sem seldir eru til styrktar félaginu.

Næst helgi er síðasta helgi sýningarinnar September / Elska ég mig samt? í Ketilhúsinu á Akureyri. Þetta er samsýning þriggja listamanna, þeirra Bjarna Sigurbjörnssonar, Jóns Óskars og Ragnheiðar Guðmundsdóttur. Opið er frá kl. 13-17 og aðgangur er ókeypis.

Evrópskir kvikmyndadagar verða nú haldnir í annað sinn á Akureyri og hefjast 24. október. Það er kvikmyndaklúbburinn KvikYndi sem stendur fyrir hátíðinni í samstarfi við Evrópustofu, Sambíó Akureyri og Bíó Paradís. Þrjár myndanna eru með enskum texta en opnunarmyndin er með íslenskum texta. Ókeypis aðgangur er að öllum sýningunum á meðan húsrúm leyfir en hver mynd er aðeins sýnd einu sinni.