Fréttasafn

Í dag var undirritaður samningur um yfirtöku Norðurorku hf. á fráveitu Akureyrarbæjar. Sameining veitna á Akureyri hefur gerst í nokkrum áföngum. Árið 1993 voru Vatnsveita Akureyrar og Hitaveita Akureyrar sameinaðar og árið 2000 bættist Rafveita Akureyrar við og til varð sameinað veitufyrirtæki Akureyringa, Norðurorka.

Mikið var um að vera í Grímsey í gær, sunnudaginn 29. desember, en þá heimsóttu eyjaskeggja bæði læknir, prestur og organisti.

Hin árlega áramótabrenna á Akureyri verður á sínum stað við Réttarhvamm á gamlárskvöld, auk þess sem boðið verður upp á flugeldasýningu. Kveikt verður í brennunni kl. 20.30 en flugeldasýningin hefst kl. 21.00.

Í byrjun mars 2014 verða haldnir alþjóðlegir vetrarleikar (Iceland Winter Games) á skíðum og snjóbrettum í Hlíðarfjalli ofan Akureyrar. Mótið verður árlegt og er haldið í starfi við Norwegian Open sem er sambærilegt stórmót í Noregi. Keppt verður í ýmsum greinum frjálsra skíðaíþrótta (freeskiing) og á snjóbrettum. Stefnt er að því að fyrsta árið verði keppendur um 100 frá Norðurlöndunum, einkum Noregi, Svíþjóð og Íslandi, en að í nánustu framtíð verði keppendur ríflega eitt þúsund og þá teygi mótið sig einnig yfir á skíðasvæðin á Dalvík og Siglufirði.

Yfir hátíðarnar verður gámasvæðið við Réttarhvamm lokað á jóladag og nýársdag. Alla aðra daga verður opið en þó er afgreiðslutími breytilegur. Opið verður sem hér segir:

Ákveðið var á fundi bæjarstjórnar Akureyrar á þriðjudag að falla frá fyrirhugaðri hækkun á vistunargjöldum (frístund) í grunnskólum bæjarins en áður hafði bæjarráð lagt til að vistunargjöld í leikskólum hækkuðu ekki. Með þessu vill bæjarstjórn sýna enn frekar í verki vilja sinn til að vinna gegn aukinni verðbólgu í landinu og standa með barnafjölskyldum í bænum eins og kostur er.

Stjórn Norðurorku hf. samþykkti á fundi sínum í desember að styrkja björgunarsveitina Súlur á Akureyri næstu þrjú árin með því að vera bakhjarl áramótaflugeldasýningar sveitarinnar. Súlur urðu til árið 1999 með sameiningu þriggja björgunarsveita á Akureyri, Hjálparsveitar skáta, Flugbjörgunarsveitarinnar og Sjóbjörgunarsveitarinnar Súlna. Sveitin hefur vaxið og dafnað á undanförnum árum og margsýnt fram á mikilvægi sitt við ýmsar erfiðar aðstæður.

Sem gefur að skilja verður nokkur breyting á akstri Strætisvagna Akureyrar yfir hátíðarnar. Enginn akstur verður á jóladag og nýársdag en akstri verður hætt um hádegisbil á aðfangadag og gamlársdag. Annan í jólum verður leið 3 ekin eins og um helgar en alla aðra daga keyra vagnarnir samkvæmt leiðarbók.

Kertakvöld verður haldið í Sundlaug Akureyrar föstudaginn 20. desember frá kl. 17-21. Bryddað var upp á þessu í fyrsta sinn í fyrra og þótti takst mjög vel. Því er leikurinn endurtekinn nú með notalegri jólastemningu, kertaljósum og jólatónlist við sundlaugarbakkann. Kaffi, kakó og piparkökur verða einnig á boðstólum.

Mikið var um að vera í Hrísey um helgina: jólatónleikar, hangikjötsveisla, upplestur og kaffihlaðborð, auk þess sem farin var skemmtileg leikhúsferð fram í Eyjafjörð að sjá Emil í Kattholti.

Lokað er á Heilsugæslustöðinni á aðfangadag og gamlársdag en minnt er á bráðamóttöku vaktlækna á FSA á helgidögum frá kl. 10-12 og 14-16. Unglingamóttakan er lokuð frá 18. desember og verður opnuð aftur 7. janúar.