Fréttasafn

Dömulegir dekurdagar verða haldnir í fimmta sinn á Akureyri helgina 11.-14. október næstkomandi. Þetta er helgi þar sem vinkonur, systur, mæðgur, frænkur og vinnufélagar njóta þess að gera eitthvað skemmtilegt saman. Hægt verður að velja úr fjölda viðburða og bjóða Flugfélag Íslands og Icelandair Hótel Akureyri upp á sérstakan dekurpakka.

Aðalheiður Valgeirsdóttir býður í listamannsspjall á morgun, laugardag, kl. 15.00 í Mjólkurbúðinni um sýningu sína Jarðsamband. Sýningin fjallar um náttúruna og þær spurningar sem vakna um tengsl manna og náttúru við síbreytilega ásýnd hennar.

Í tilefni þess að 90 ár eru liðin frá því að Glerárvirkjun tók til starfa verður opið hús hjá Norðurorku hf. á morgun, laugardag, kl. 10.00-14.00. Opið verður í Glerárvirkjun og á Rangárvöllum þar sem gengið verður inn að vestan.

Bandaríkjamaðurinn Dr. William H. Thomas, upphafsmaður Eden hugmyndafræðinnar (Eden Alternative), heimsótti öldrunarheimili Akureyrar fyrr í vikunni. Hann er staddur hér á landi vegna ráðstefnu um Eden hugmyndafræðina sem haldin var á Hótel Sögu í gær. Um 160 manns tóku þátt í ráðstefnunni og voru fyrirlesarar frá Íslandi, Bandaríkjunum, Danmörku, Færeyjum, Bretlandi, Þýskalandi, Austurríki og Suður Afríku. Auk þess að heimsækja öldrunarheimili bæjarins hélt dr. Thomas erindi í samkomusalnum í Hlíð þar sem hann sagði frá tilurð hugmyndafræðinnar og svaraði spurningum gesta úr sal.

Alþjóðastofa (Akureyri Intercultural Centre) opnaði á dögunum nýja og glæsilega heimasíðu, astofan.akureyri.is. Alþjóðastofa er upplýsinga- og ráðgjafaþjónusta fyrir útlendinga um skólamál, félagslega þjónustu, skattamál, tryggingar, heilbrigðisþjónustu, námskeið í íslensku, dvalar- og atvinnuleyfi og margt fleira. Hún miðlar einnig túlkum og þýðendum fyrir fólk og stofnanir þegar þess gerist þörf.

Á morgun, miðvikudag, kl. 18.00 verða fjáröflunartónleikar í Hofi vegna ferðar sellónemenda Tónlistarskólans á Akureyri til Barcelona. Aðgangseyrir er kr. 500 fyrir 13 ára og eldri en einnig verður tekið á móti frjálsum framlögum. Allir sellónemendur skólans munu koma fram á tónleikunum og leika fjölbreytta dagskrá íslenskra og erlendra verka.

Íslandsdeild EFSA (European Federation of Sea Anglers) stendur fyrir Evrópumeistaramóti í strandstangveiðum í Eyjafirði dagana 24.-29. september. Akureyrarbær er gestgjafi þessa fyrsta móts sinnar tegundar sem haldið er hér á landi.

Þór sigraði Hött 1-0 þegar liðin mættust á Þórsvelli á laugardaginn í lokaumferð 1. deildar karla í knattspyrnu. Sigurður Marinó Kristjánsson skoraði eina mark leiksins á 18. mínútu í 10. sigurleik Þórs í röð. Þórsarar höfnuðu í efsta sæti deildarinnar með 50 stig og munu því spila í úrvalsdeild næsta sumar.

Listamaður septembermánaðar í gestavinnustofu Gilfélagsins er þýski myndlistarmaðurinn Jens Reichert en þetta er í þriðja sinn sem hann heimsækir Ísland. Gestavinnustofan verður opin á morgun, laugardag, kl. 14.00-21.00. Reichert kom til Akureyrar frá Seyðisfirði þar sem hann dvaldi í gestavinnustofu Skaftfells í einn mánuð.

Sinfóníuhljómsveit Íslands heldur tónleika í Hofi í kvöld, föstudagskvöld, kl. 19.30. Flutt verður ein vinsælasta sinfónía Peters Tchaikovsky, Sinfónía nr. 5, og Konsert nr. 1 í C-dúr eftir Haydn undir stjórn Ilans Volkovs. Einleikari á tónleikunum verður Bryndís Halla Gylfadóttir en hún er þekkt fyrir frábæra túlkun og glæsileika.

Félag íslenskra safna og safnmanna heldur þessa dagana farskóla sinn í menningarhúsinu Hofi undir yfirskriftinni "Aðgengi að menningararfinum". Metþátttaka er í skólanum en alls eru um 120 starfsmenn íslenskra safna skráðir til leiks.