Fréttasafn

Afmælisvaka stendur nú sem hæst og hófust viðburðir dagsins kl. 10 í morgun þegar formleg afhending á söguvörðum fór fram við athöfn í Innbænum. Söguvörðurnar eru gjöf Norðurorku hf. til Akureyrar í tilefni 150 ára afmælisins. Viðburðir fóru fram víða um bæinn í gærkvöldi og voru vel sóttir. Fjöldi fólks var saman kominn í rómantíska Rökkurró í Lystigarðinum þar sem garðurinn var ljósum prýddur og veittar voru viðurkenningar fyrir vel hirta garða auk þess sem ýmsir listamenn tróðu upp. Skemmtileg stemning myndaðist á Exodus tónleikum rafsveitarinnar Reyk Week í Listagilinu og Draugaganga Minjasafnsins þótti kyngimögnuð.

Í tilefni Afmælisvöku – 150 ára afmælishátíðar Akureyrar mun Vodafone í samstarfi við N4 senda út sérstaka sjónvarpsstöð á hefðbundinni rás sjónvarpsstöðvarinnar N4. Þar gefst gestum Afmælisvöku tækifæri til að láta ljós sitt skína með því að senda inn myndir og tíst í gegnum snjallsíma sína. Útsendingarnar hófust í gær og halda áfram í allan dag en dagskráin verður endursýnd á morgun, sunnudag.

Í dag, laugardaginn 1. september kl. 10.00, verða sex ný söguskilti afhjúpuð í hjarta gömlu Akureyrar og sérstök athöfn fer fram við áningarstaðinn á móts við Tuliniusarhús (við bílastæðin norðan Brynju). Sagt verður frá tilurð skiltanna, efnisvali og umfangi.

Afmælisvaka Akureyrar hefur nú staðið í viku og nær hápunkti um helgina. Ákaflega góð stemning hefur verið í bænum og þau voru mörg ógleymanlegu augnablikin sem fólk upplifði á sjálfan afmælisdaginn, 29. ágúst.

Hin goðsagnakennda hljómsveit Baraflokkurinn heldur tónleika á Græna hattinum í kvöld, föstudagskvöld, kl. 22.00. Einnig mun hljómsveitin koma fram á Afmælistónleikunum í Gilinu annað kvöld kl. 21.00 ásamt Skriðjöklum, 200.000 naglbítum og Hvanndalsbræðrum. Baraflokkurinn mun spila lög af plötum sveitarinnar sem komu út á árunum 1981-1983.

Í tilefni af 25 ára starfsafmæli Háskólans á Akureyri er boðið til hátíðarhalda í húsakynnum skólans á næstkomandi sunnudag kl. 13.00 til 16.00. Hátíðardagskráin hefst á sviði í Miðborg, anddyri háskólans, þar sem m.a. verður sýndur hluti úr leikverkinu Borgarinnan eftir Sögu Jónsdóttur. Að því loknu tekur við dagskrá um allan háskóla þar sem margt verður í boði s.s. gönguferð með leiðsögn um byggingar háskólans með áherslu á arkitektúr og listaverk, sýning á vegum barnabókaseturs, bangsasjúkrahús og endurhæfing og í lok dagsins er hægt að fara í Sögugöngu um Sólborgarsvæðið. Boðið verður upp á köku og kaffi auk þess sem grillað verður sjávarfang og pylsur.

Opinn hátíðarfundur bæjarstjórnar Akureyrar var haldinn í Hofi á 150 ára afmælisdegi Akureyrar þar sem sérstakir gestir voru Ólafur Ragnar Grímsson forseti Íslands og Jón Gnarr borgarstjóri Reykjavíkur. Á fundinum voru samþykktar tillögur um að Glerárdalur verði gerður að fólkvangi og um að setja ákveðna upphæð árlega í umhverfisátak næstu fimm árin sem hugsað er í göngu- og hjólastíga, leikvelli og annað sem gerir umhverfið fallegra. Auk þess sem Jónu Bertu Jónsdóttur og Hermanni Sigtryggssyni veittar sérstakar heiðursviðurkenningar í tilefni af 150 ára afmæli bæjarins.

Þrjú ungskáld frá Akureyri, Vilhjálmur B. Bragason, Gréta Kristín Ómarsdóttir og Gunnar Már Gunnarsson, munu lesa úr verkum sínum í Flóru, á nk. laugardag kl. 16.00 og er viðburðurinn hluti af dagskrá Afmælisvöku.

Í afmælisgöngunni í kvöld, fimmtudagskvöld, verður gengið um slóðir Akureyrarskáldanna. Akureyrarbær hefur stundum verið nefndur “skáldabærinn" vegna fjölda eldri og yngri skálda sem hér hafa alið manninn. Í tilefni af afmæli Akureyrarbæjar verður farið í ljóðagöngu um brekkuna og heilsað upp á skáldin sem þar bjuggu og lesið úr ljóðum þeirra. Lagt verður af stað frá planinu sunnan við Amtsbókasafnið kl. 20.00 og göngunni lýkur við Sigurhæðir.

Í gær á 150 ára afmælisdegi Akureyrar voru formlega afhentir lyklar að nýju dvalarheimili við Vestursíðu sem fengið hefur nafnið Lögmannshlíð og á næstu dögum munu flytjast þangað þeir 45 íbúar Kjarnalundar og Bakkahlíðar. Nýja dvalarheimilið er hið fyrsta á Íslandi sem er að fullu hannað í anda Eden-hugmyndafræðinnar. Í Eden-hugmyndafræðinni er lögð áhersla á sjálfræði, virðingu, umhyggju, væntumþykju og gleði.

Eins og flestum er kunnugt stendur nú yfir Afmælisvaka - 150 ára afmælishátíð Akureyrar og af því tilefni er óskað eftir samvinnu við íbúa og fyrirtæki um að hreinsa vel til, halda bænum hreinum og henda ekki rusli á almannafæri. Einnig er hvatt til þess að skreyta garða og hús með hvítum perum og flagga íslenska fánanum um komandi helgi.