Fréttasafn

Laugardaginn 3. mars verður Dagur tónlistarskólanna haldinn hátíðlegur í Hofi með hljóðfærakynningu og fjölda tónleika. Tónlistarskólinn á Akureyri hvetur bæjarbúa til að koma og kynna sér hljóðfærin sem kennt er á. Allir eru hjartanlega velkomnir og ókeypis er á alla tónleika. Nánari upplýsingar eru á www.tonak.is.

Fyrsti sjónvarpsþátturinn af tíu sem gerður er í tilefni af 150 ára afmæli Akureyrarbæjar verður sýndur á sjónvarpsstöðinni N4 kl. 18.30 í kvöld og fjallar um atvinnulífið í bænum eins og það var, er og getur orðið. Þáttaröðin verður sýnd síðasta þriðjudag hvers mánaðar kl. 18.30.

Vel heppnaðri Atvinnu- og nýsköpunarhelgi lauk í Háskólanum á Akureyri á sunnudag, þegar veitt voru verðlaun fyrir athyglisverðustu hugmyndirnir. Um 90 þátttakendur mættu til leiks á föstudag, eða 20 fleiri en í fyrra þegar slík vinnuhelgi var haldin í fyrsta sinn og í upphafi voru kynntar 34 hugmyndir. Ekki var unnið með allar hugmyndirnir en dómnefnd voru kynntar 19 hugmyndir sem unnið hafði verið með um helgina.

Föstudaginn 2. mars kl. 12 verða Föstudagsfreistingar Tónlistarfélags Akureyrar í Ketilhúsinu. Þetta eru hádegistónleikar og er boðið upp á súpu, brauð og kaffi frá Goya Tapas á meðan hlýtt er á tónlist úr ýmsum áttum. Að þessu sinni flytja Kristín Lárusdóttir sellóleikari og Ástríður Alda Sigurðardóttir píanóleikari efnisskrá sína „Klassík – dægurlög – tangó“.

Í erindi sínu í dag í AkureyrarAkademíunni kl. 17 ætlar Margrét Guðmundsdóttir sagnfræðingur að rjúfa skarð í þann þagnarmúr sem hlaðinn er um sögu verkakvenna. Erindi hennar nefnist "Síldarstúlka fær málið - Hversdagslíf söltunarstúlku á Hjalteyri sumarið 1915." Fyrirlesturinn er hluti af fyrirlestraröð AkureyrarAkademíunnar veturinn 2011 til 2012. Allir eru velkomnir - heitt á könnunni.

Hinn 26. júní nk. lendir Airbus 320 þota á Akureyrarflugvelli með allt að 180 ferðamenn frá Slóveníu á vegum Ferðaskrifstofunnar Nonna. Fólkið mun leggja leið sína um Norðurland og önnur landsvæði næstu 7 dagana áður en það snýr aftur til síns heima 3. júlí. Samstarfsaðilar í Slóveníu eru Adria Airways og ferðaskrifstofur sem hafa selt ferðir til Íslands í mörg ár. Það hefur kostað mikla fyrirhöfn að telja hina erlendu samstrafsaðila á að fljúga til Akureyrar því Reykjavík og Keflavíkurflugvöllur eru flestum efst í huga.

Það hefur verið skrautlegt um að litast á götum Akureyrar í dag og ýmsar kynjaverur á kreiki. Hæglætisveður með dálítilli ofankomu hefur síst dregið úr ákafa skólakrakka sem arka á milli búða og syngja fyrir nammi. Kötturinn var sleginn úr tunnunni bæði á Glerártorgi og á flötinni fyrir neðan Samkomuhúsið. Söngurinn ómar um stræti og torg og allir eru í sólskinsskapi. Smellið á meðfylgjandi myndir til að sjá stærri útgáfur og fletta á milli þeirra.

Bíó Paradís í samstarfi við KvikYndi (Kvikmyndaklúbb Akureyrar) sýnir kvikmyndir á breiðtjaldi í bestu mögulegu hljómgæðum og færa þannig andrúmsloft kvikmyndanna í Hof. Í kvöld, 22. febrúar kl. 20, verður kvikmyndin Superclásico (Erkifjendur) sýnd en þessi eldfjöruga rómantíska kómedía frá leikstjóra Flammen og Citronen sló rækilega í gegn í Danmörku fyrr á árinu og var nýlega valin framlag Danmerkur til Óskarsverðlaunanna.

Löng hefð er fyrir því á Akureyri að krakkar komi saman og slái köttinn úr tunnunni á öskudaginn. Það verður annars vegar gert á flötinni fyrir framan Samkomuhúsið kl. 10.30 og hins vegar á Glerártorgi kl. 13.30. Í tilefni af 150 ára afmæli Akureyrarkaupstaðar ætla Norðurorka og Leikfélag Akureyrar að leiða saman hesta sína og bjóða krökkum í kattarslag á leikhúsflötinni kl. 10.30. Liðin sem slá tunnuna í sundur og slá köttinn úr henni fá hvort um sig fjóra miða á Gulleyjuna og sá sem vinnur búningasamkeppnina fær tvo miða á Gulleyjuna. Í Samkomuhúsinu verður síðan tekið vel á móti öllum syngjandi kátum sjóræningjum og landkröbbum. Krökkum verður boðið upp á svið til að syngja Öskudagssöngva og samkeppni verður um flottasta búninginn.

Í morgun kynnti bakarameistarinn Andrés Magnússon í Bakaríinu við brúna til sögunnar afmælistertu Akureyrar, skreytta með afmælismerkinu en tertan verður á boðstólum í bakaríinu út árið og jafnvel lengur. Afmælisnefndin fékk við þetta tækifæri að bragða á tertunni og taldi hana afar ljúffenga og einkar saðsama. Bakaríið við brúna er fyrsta fyrirtækið á Akureyri sem nýtir sér 150 ára afmælismerkið á framleiðslu sína en eflaust munu fleiri fylgja í kjölfarið.

Atvinnu- og nýsköpunarhelgin fer fram á Akureyri helgina 24. til 26. febrúar. Viðburðurinn er haldinn er í þeim tilgangi að hjálpa einstaklingum að koma hugmyndum sínum í framkvæmd. Að helginni standa Innovit nýsköpunar- og frumkvöðlasetur og Landsbankinn í samstarfi við Akureyrarbæ. Eins styðja fjölmörg fyrirtæki af svæðinu rausnarlega við viðburðinn.