Fréttasafn

Hin árlega áramótabrenna á Akureyri verður á sínum stað við Réttarhvamm á gamlárskvöld, auk þess sem boðið verður upp á flugeldasýningu. Kveikt verður í brennunni kl. 20.30 en flugeldasýningin hefst kl. 21.00.

Strætisvagnar Akureyrar aka til hádegis á aðfangadag og gamlársdag. Síðustu ferðir úr miðbæ eru sem hér segir:

Í tilefni af 150 ára afmæli Akureyrarkaupstaðar færðu sveitarfélögin í Eyjafirði og Þingeyjarsveit bænum að gjöf eina milljón króna til að opna "Ljósmyndavef Akureyrar". Fulltrúar sveitarfélaganna afhentu gjöfina formlega á miðvikudag.

Árleg blysför í þágu friðar verður farin frá Samkomuhúsinu á Akureyri kl. 20 á Þorláksmessu. Ávarp flytur Ragnar Elías Ólafsson Þveræingagoði og Gefjunarfélagar kveða rímur. Blysförin er farin gegn stríði í heiminum en víða er nú róstusamt og íbúar margra landa búa við stríðsástand.

Síðastliðið haust hóf Strætó bs. áætlunarferðir á milli Akureyrar og Reykjavíkur og frá og með 2. janúar næstkomandi bætast við ætlunarferðir um Norður- og Norðausturland. Um er að ræða ferðir frá Akureyri til Dalvíkur, Ólafsfjarðar og Siglufjarðar og Húsavíkur, Þórshafnar og Egilsstaða með viðkomu í Mývatnssveit og á Laugum.

Nýverið var úthlutað styrkjum úr Vaxtarsamningi Eyjafjarðar til átta verkefna. Heildarupphæð úthlutunarinnar nam 19 milljónum króna. Þetta er síðasta úthlutun ársins, en alls hafa verið veitt styrkloforð til 17 verkefna á árinu upp á samtals 48.550.000 krónur.

Árleg skötuveisla um borð í Húna II var haldin á mánudags- og þriðjudagskvöld og var þétt setinn bekkurinn. Það er Hollvinafélag Húna sem stendur fyrir þessum samkomum sem hafa mælst afar vel fyrir, enda stemningin einstök um borð í eikarbátnum þar sem hann liggur bundinn við Torfunefsbryggju.

Akureyrarbær efndi til íbúaþings í Hofi á Akureyri fimmtudaginn 8. nóvember 2012 kl. 16.30-20.30 í þeim tilgangi að fá fram hugmyndir íbúa um framtíð samfélagsins til langs tíma og skapa þannig grunn að nýrri langtímaáætlun í anda Staðardagskrár 21. Akureyri var í hópi fyrstu sveitarfélaganna á Íslandi sem byggðu áætlanir sínar á hugmyndafræði sjálfbærrar þróunar. Þessi hugmyndafræði gengur í aðalatriðum út á að skoða sérhvert mál í stóru samhengi út frá vistfræðilegum, samfélagslegum og efnahagslegum þáttum og reyna að sjá fyrir hvaða áhrif ákvarðanir í samtímanum hafa á hag komandi kynslóða, nær og fjær. Aðalmarkmiðið er að afkomendur okkar geti lifað góðu lífi – í Akureyrarbæ, á Íslandi og hvar sem er í heiminum.

Gert hefur verið nýtt myndband við afmælislag Akureyrar "Ég sé Akureyri" eftir Bjarna Hafþór Helgason. Lagið er hér í útsetningu Gunnars Þórðarssonar, sungið af Jóhanni Vilhjálmssyni og Óskari Péturssyni. Einnig er til dansútgáfa og önnur rólegri útgáfa þar sem Marína Ósk Þórólfsdóttir syngur en Kristján Edelstein útsetur.

Á næstkomandi fimmtudag, 20. desember kl. 17.00-21.00, mun sannur jólaandi svífa yfir Sundlaug Akureyrar. Þá verður kertum dreift um úti- og innisvæði, ljós deyfð og hugljúf tónlist spiluð. Einnig verður boðið upp á kaffi, kakó og piparkökur. Hér gefst fólki einstakt tækifæri til þess að slaka á í amstri jólaundirbúningsins án mikillar fyrirhafnar og nú er bara að vona að veðurguðirnir setji ekki strik í reikninginn.

Lið Akureyrar mætir liði Ísafjarðarbæjar í 16-liða úrslitum Útsvars, spurningakeppni sveitarfélaganna, í Sjónvarpinu í kvöld. Sem fyrr skipa þau Hjálmar Stefán Brynjólfsson, Hildur Eir Bolladóttir og Sigurður Erlingsson lið Akureyrar en þau sigruðu síðast lið Hveragerðis glæsilega, 113-59.