Hápunktur Afmælisvöku um helgina

Ráðhústorg á afmælisdaginn. Mynd: Auðunn Níelsson.

Í kvöld, föstudagskvöld, verður hin sívinsæla Rökkurró haldin í Lystigarðinum sem verður ljósum prýddur og fagurlega skreyttur í tilefni dagsins. Á sama tíma hefst kjötkveðjuhátíð Sjónlistamiðstöðvarinnar með raftónleikunum Exodus í Listagilinu. Draugaslóð Minjasafnsins verður síðan farin kl. 22.30.

Af viðburðum á laugardag má nefna afhjúpun á sérstökum söguskiltum í gamla Innbænum, sögugöngu um Lystigarðinn kl. 11 og hátíðardagskrá á Akureyrarvelli sem hefst kl. 14.00. Þar verður boðið upp á hátíðlega dagskrá í tali og tónum, aðalræðumaður verður Akureyringurinn Páll Skúlason, fyrrverandi rektor Háskóla Íslands.

Barnaskemmtun verður á Ráðhústorgi kl. 15.00 og afmælistónleikar með akureyrsku hljómsveitunum Bara flokknum, 200.00 naglbítum, Skriðjöklum og Hvanndalsbræðrum hefjast kl. 21.00. Tónleikarnir verða í beinni útsendingu á N4 og Rás 2. Herlegheitunum lýkur síðan með einstakri flugeldasýningu og ljósasýningu á Menningarhúsinu Hofi og á Pollinum kl. 23.30.

Dagskráin í heild sinni. Facebook síða Afmælisvöku.

Hér að neðan má sjá myndir sem Auðunn Níelsson tók af margvíslegum viðburðum Afmælisvöku.