Þann 6. maí nk. hefst átakið ,,Hjólað í vinnuna" á vegum ÍSÍ. Allir sem nýta eigin orku til að ferðast til og frá vinnu eru gjaldgengir þátttakendur þ.e. hjóla, skokka, ganga, nota línuskauta o.s.frv. Á heimasíðunni http://hjoladivinnuna.is/ er hægt að skrá lið í átakið og þar er einnig að finna allar nánari upplýsingar. Vinnustaðir Akureyrarbæjar eru hvattir til að taka þátt í þessari skemmtilegu, heilsusamlegu og umhverfisvænu keppni.

Akureyrarbær hefur stofnað sérstakt netfang sparnadur@akureyri.is til að taka við hugmyndum starfsmanna og stjórnenda um lækkun kostnaðar í rekstri Akureyrarbæjar. Hugmyndirnar mega ná til allrar starfsemi bæjarins og þurfa ekki að einskorðast við starfstöð viðkomandi starfsmanns. Hugmyndirnar mega líka ná til allra rekstrarþátta í starfseminni hvort sem um er að ræða laun eða önnur rekstrargjöld.

Hugmynd um launalaus leyfi starfsmanna Akureyrarbæjar var kynnt á fundi með stjórnendum Akureyrarbæjar þann 1. apríl sl. og í framhaldinu kynntu stjórnendur hugmyndina fyrir starfsfólki sínu. Frítakan mun ekki skerða sumarfrí starfsmanna svo fremi að ekki sé um fleiri en 12 launalausa frídaga að ræða á hverju ári. Persónuuppbætur starfsmanna svo sem orlofsuppbót, annaruppbót kennara eða desemberuppbót munu heldur ekki skerðast. 

Vinnuskólinn verður starfandi frá 8. júní til 27. júlí í sumar. Tekið er við umsóknum frá 1. - 19. apríl 2009.

Þann 17. mars sl. var ný mannauðsstefna samþykkt í bæjarstjórn Akureyrarbæjar. Síðastliðið sumar skipaði bæjarstjóri starfshóp til að vinna að endurskoðun á starfsmannastefnu Akureyrarbæjar. Starfshópurinn hóf störf í september og fundaði vikulega fram í desember, alls 15 sinnum. Ýmsir aðilar voru kallaðir til samráðs s.s. jafnréttisráðgjafi, bæjarlögmaður og starfsmannastjóri.

Skyggnir hefur annast rekstur tölvukerfa Akureyrarbæjar síðan í janúar 2002 en er um þessar mundir að afhenda Þekkingu það verkefni eftir útboð sem fór fram á fyrri hluta síðasta árs. Af þessu tilefni var starfsmönnum Skyggnis sem hafa þjónað Akureyrarbæ síðustu árin boðið í morgunkaffi í Ráðhúsinu og þeir leystir út með gjöfum.

Frá og með 31. mars 2009 verða allir launaseðlar hjá Akureyrarbæ rafrænir og verða þess vegna ekki lengur prentaðir og sendir heim til starfsfólks. Rafræna launaseðla getur starfsfólk nálgast á starfsmannavef bæjarins http://eg.akureyri.is og í sínum heimabanka.