Yfirlit frétta

Á laugardaginn kemur hefst evrópsk samgönguvika um allt land. Að því tilefni verður Stóri hjóladagurinn haldinn í Kjarnaskógi í samstarfi Akureyrarbæjar og Hjólreiðafélags Akureyrar. Viðburðurinn hefst klukkan 14 og eru gestir hvattir til að koma hjólandi í skóginn. Gera má ráð fyrir að það taki um 20-30 mínútur fyrir miðlungsvant hjólreiðafólk að hjóla í Kjarnaskóg frá Ráðhústorgi svo dæmi sé tekið.

Framkvæmdir eru að hefjast við hið nýja Móahverfi nyrst í bænum. Í næstu viku verður hafist handa við lagnavinnu á vegum Norðurorku um leið og undirbúningur að gatnagerð hefst. Af þeim sökum verður lokað fyrir umferð ökutækja, hjólandi og gangandi, um nyrsta hluta Borgarbrautar sem sjá má á meðfylgjandi mynd. Íbúar í næsta nágrenni þurfa því að fara aðrar götur til að komast til síns heima. Búast má við að þessi kafli Borgarbrautar verði lokaður í talsverðan tíma meðan á uppbyggingu í Móahverfi stendur.

Stórum hluta undirbúnings fyrir uppsteypu á kirkjutröppunum er lokið en þegar mokað var frá efsta vegg gömlu snyrtinganna kom í ljós að steypa þurfti utan á vegginn að hluta áður hægt væri að bræða vatnsvörn á hann, einangra og leggja drenlagnir.