Þriðjudaginn 24. júní kl. 17:30 ætlar heilsuráð Akureyrarbæjar að standa fyrir gönguferð um Kjarnaskóg fyrir starfsfólk bæjarins. Í boði verða tvær gönguleiðir. Annars vegar styttri leið sem kemur til með að taka ca. hálftíma og hins vegar leið sem tekur um klukkustund. Skógræktarfélag Eyfirðinga mun segja frá skóginum í stuttu máli og veita leiðsögn í lengri leiðinni. Leiðsögumaður mun einnig fylgja hópnum sem fer styttri leiðina. Heilsuráð hvetur alla vinnustaði til þess að nýta tækifærið og njóta útivistar saman í góðum félagsskap. Að sjálfsögðu eru vinir og vandamenn velkomnir með.

Samband íslenskra sveitarfélaga og Félag grunnskólakennara (FG) undirrituðu kjarasamning þann 20. maí sl. Ein helsta nýjungin í þeim samningi felur í sér gerð nýs vinnumats kennara þar sem metinn verður sá tími sem kennari ver til skilgreindra verkefna. Byggt verður viðmiðum sem lögð verða til grundvallar mati á umfangi kennslu, undirbúnings, námsmats, umsjónar og þverfaglegs samstarfs. Vegna samsetningar og fjölda í nemendahópi, skráninga, skýrsluvinnu og foreldrasamskipta svo dæmi séu tekin. Verkefnisstjórn hefur verið skipuð sem hefur yfirumsjón með gerð leiðarvísis um vinnumat og mun styðja við innleiðingu þess í grunnskólum. Hana skipa 6 aðalmenn, 3 frá FG og 3 frá sambandinu, auk áheyrnarfulltrúa Skólastjórafélags Íslands (SÍ).

Í Velferðarstefnu Akureyrarbæjar fékk Heilsuráð Akureyrarbæjar það verkefni að vinna að því að á vinnustöðum verði stofnaðar heilsueflingarnefndir. Samkvæmt stefnunni er hlutverk þeirra að stuðla að heilsueflingu og góðu vinnuumhverfi auk þess að vera tengiliðir við Heilsuráð Akureyrarbæjar. Fimmtudaginn 22. maí stóð Heilsuráð Akureyrarbæjar fyrir fundi með heilsueflingarnefndum vinnustaða Akureyrarbæjar.

Innanbæjarkrónikan er komin út og má nálgast hana á rafrænu formi í starfsmannahandbókinni http://www.akureyri.is/starfsmannahandbok/kronikan.