Umhverfisátaki fram haldið

Mynd: Auðunn Níelsson.

Í tilefni af 150 ára afmæli Akureyrarkaupstaðar 2012 var ákveðið í bæjarstjórn Akureyrar að verja allt að hálfum milljarði í sérstakt umhverfisátak næstu fimm árin. Framkvæmdaráð vann áætlun eftir ríflega 200 tillögum sem bárust í byrjun þessa árs og nú er óskað eftir nýjum tillögum frá bæjarbúum fyrir árið 2014.

Á næsta ári líkt og því síðasta verða allt að 100 milljónir lagðar í átakið og er fjárveitingin einkum ætluð til nýframkvæmda og stofnbúnaðarkaupa sem fyrst og fremst tengjast umhverfismálum í sveitarfélaginu öllu, svo sem endurgerð og nýframkvæmd leikvalla, gerð göngu- hjóla- og reiðstíga, fegrun og frágang opinna svæða og torga, skógrækt, grisjun, endurgerð og endurplöntun, frágangi og gerð fólkvanga/útivistarsvæða.

Nánari upplýsingar um átakið eru á heimasíðu framkvæmdadeildar Akureyrarbæjar. Þar er hægt að skoða þær tillögur sem borist hafa og senda inn nýjar.

Frestur til að skila inn tillögum er til 15. janúar 2014.