Ótal hugmyndir reifaðar á Stórþingi ungmenna í Hofi

Fjörmiklar umræður ómuðu um salinn Hamraborg í Hofi í morgun þegar þar var haldið Stórþing ungmenna á Akureyri. Unga fólkið ræddi allt á milli himins og jarðar sem snertir á einn eða annan hátt daglegt líf þess í bænum. Ótal hugmyndir svifu um salinn hvort heldur sem rætt var um tómstundastarf ungmenna, skólastarfið, andlega líðan, orðræðu á samfélagsmiðlum eða hvaðeina annað. Áherslur í umræðunum voru valdar eftir samtal Ungmennaráðs Akureyrarbæjar við nemendaráð skóla í bænum.

Unnið verður úr niðurstöðum þingsins en gestir þess gáfu hugmyndum vægi eftir mikilvægi og eins verður skoðað hvort sömu eða svipaðar hugmyndir koma oftar fyrir en aðrar. Skoðaður verður farvegur fyrir hugmyndir og ábendingar. Því sem hæst stendur verður komið í aðgerðaáætlun Barnvæns sveitarfélags sem unnin er til tveggja ára í senn.

Stórþingið er vettvangur fyrir börn og ungmenni í sveitarfélaginu til þess að koma á framfæri sínum hugmyndum um þá þjónustu sem sveitarfélagið býður upp á og ræða málefni sem brenna á þeim m.a. út frá fyrir fram ákveðnum umræðupunktum. Markmiðið er að fanga hugmyndir og skoðanir barna og ungmenna í sveitarfélaginu, kortleggja þær og koma áleiðis inn í stjórnsýsluna. Stórþingið er stefnumótandi verkfæri fyrir sveitarfélagið og verða niðurstöðurnar notaðar í áframhaldandi vinnu, s.s. fyrir verkefnið Barnvænt sveitarfélag.

Þátttakendur voru börn og ungmenni á aldrinum 12-18 ára, þ.e. frá 7. bekk og upp í þriðja bekk í framhaldsskóla. Óskað var eftir fjórum nemendum úr fjórum elstu árgöngum allra grunnskóla Akureyrarbæjar, þ.e. 16 nemendur úr 7.-10. Bekk. Þá var óskað eftir átta nemendum undir 18 ára aldri úr hvorum framhaldsskóla fyrir sig, þ.e. 16 framhaldsskólanemendur.

Akureyrarbær var fyrst sveitarfélaga á Íslandi til að verða viðurkennt barnvænt sveitarfélag en Ísland staðfesti Barnasáttmála Sameinuðu þjóðanna árið 2013. Verkefnið Barnvæn sveitarfélög er verkfæri til að innleiða sáttmálann á Íslandi með markvissum hætti og tileinka sér barnaréttindanálgun í sínum verkefnum, stefnumótun og ákvörðunum.

Nú hafa hafa 23 sveitarfélög á Íslandi hafið vinnu við að verða barnvæn sveitarfélög og búa 50,7% allra barna á landinu í þessum sveitarfélögum.

Smellið á myndirnar að neðan til að sjá stærri útgáfur og fletta á milli þeirra.