Frá æfingu.
Barokkóperan Dido og Aenaeas eftir Henry Purcell verður flutt í menningarhúsinu Hofi á Akureyri sunnudaginn 1. apríl kl. 17. Flytjendur eru
kammerkórinn Hymnodia og Barokksveit Hólastiftis undir stjórn Eyþórs Inga Jónssonar. Allir einsöngvarar í sýningunni koma úr
röðum kórfélaga en með aðalhlutverkin fara Helena G. Bjarnadóttir og Michael Jón Clarke. Guðmundur Ólafsson leikstýrir verkinu og
Ingibjörg Björnsdóttir semur og stýrir dansatriðum.
Óperan Dido og Aeneas er gerð við libretto sem Nahum Tate byggði á eigin leikriti, Brutus of Alba, eða The enchanted lovers frá árinu 1678.
Efniviðurinn er úr fjórðu bók sagnabálksins Aeneid eftir rómverka sagnaritaran Virgil. Þar segir frá flótta Aeneasar eftir
Trójustríðið, samfundum hans og skilnaði við Dido og ferðalögum hans um Miðjarðarhafið til að fullnusta vilja guðanna, að reisa
„nýja Tróju" á Ítalíu. Sagan er ástar- og harmsaga, en þó með léttum köflum. Rauði þráðurinn er
sá að það eru guðirnir og forlögin sem ráða förinni og menn verða að hlíta sínum fyrir fram ákveðnu örlögum.
Í verkinu er sorg og gleði, dulúð og kímni, enda koma fram spaugilegar en illkvittnar nornir og svellkaldir sjóarar en auðvitað líka virðulegur
aðallinn, kóngur og drottning.
Hymnodia fetar nú nýjar slóðir í tónlistarflutningi sínum. Þetta hefur reyndar verið aðalsmerki kórsins, semsé að
finna sífellt upp á einhverju nýju og öðruvísi en bæði Hymnodia og aðrir kórar hafa verið að gera. Mörgum er í fersku
minni Stjórnarskrá Lýðveldisins Íslands eftir Karólínu Eiríksdóttur sem Hymnodia flutti og vakti gleði og hrifningu sumra en
misjöfn viðbrögð annarra, einkum þegar verkið var flutt í Sjónvarpinu. Hymnodia hefur mikið fengist við kórspuna, gefið út
plötu með verkum eftir íslenskar konur, sungið á bílaverkstæði og í gamalli síldarverksmiðju ekki síður en í kirkjum og
tónleikahúsum en rauður þráður í starfi kórsins hefur verið flutningur barokktónlistar. Að því leyti er flutningurinn
á Dido og Aeneas í stíl við fyrri viðfangsefni nema hvað leikur og dans í bland við sönginn er nýmæli fyrir flesta
kórfélaga.
Miðar eru seldir í Hofi og á www.midi.is.