Dalsbraut sunnan Þingvallastrætis og nágrenni – Tillaga að deiliskipulagsbreytingu

Bæjarstjórn Akureyrarkaupstaðar auglýsir hér með tillögu að deiliskipulagsbreytingu Dalsbrautar sunnan Þingvallastrætis og nágrenni skv. 1. mgr. 43. gr. skipulagslaga nr. 123/2010.

Svæðið sem deiliskipulagið nær til er götustæði Dalsbrautar frá Þingvallastræti í norðri að Miðhúsabraut í suðri ásamt nokkrum fullbyggðum íbúðasvæðum sem liggja að götustæðinu.

Með úrskurði Úrskurðarnefndar umhverfis- og auðlindamála var norðurhluti skipulagsins, frá Skógarlundi að Þingvallastræti, felldur úr gildi þar sem ósamræmi var milli deiliskipulagsins og gildandi aðalskipulags. Nú hefur aðalskipulagi verið breytt.

Tillaga að deiliskipulagsbreytingunni felur í sér að norðurhluti skipulagssvæðisins, frá Skógarlundi að Þingvallastræti, taki gildi og verði hluti af núgildandi skipulagsgögnum. Þar er m.a. gert ráð fyrir tengibrautinni Dalsbraut, göngu- og hjólreiðastígum og eru byggingarreitir og nýtingahlutfall skilgreint fyrir allar lóðir innan svæðisins. Önnur breyting er gerð á suðurhluta skipulagssvæðisins, en þar eru hljóðmanir meðfram Dalsbraut beggja vegna lengdar til suðurs.

Tillöguuppdráttur ásamt greinargerð, umhverfisskýrslu og öðrum fylgigögnum mun liggja frammi í þjónustuanddyri Akureyrarkaupstaðar, Geislagötu 9, 1. hæð frá 12. september til 24. október 2012, svo að þeir sem þess óska geti kynnt sér tillöguna og gert við hana athugasemdir. Hér fyrir neðan eru öll skipulagsgögnin aðgengileg:

Dalsbraut - norðurhluti

Dalsbraut - suðurhluti

Skýringaruppdráttur

Greinargerð

Húsakönnun

Hljóðskýrsla

Frestur til að gera athugasemdir við tillöguna rennur út kl. 16:00 miðvikudaginn 24. október 2012 og skal athugasemdum skilað skriflega til skipulagsdeildar Akureyrarkaupstaðar, Geislagötu 9, 3. hæð, eða í tölvupósti (skipulagsdeild@akureyri.is) þar sem nafn, kennitala og heimilisfang sendanda kemur fram. Hver sá sem ekki gerir athugasemdir við tillöguna innan þessa frests telst vera henni samþykkur.

                                                  12. september 2012
                                                  Skipulagsstjóri Akureyrarkaupstaðar