Fréttasafn

Þann 8. september, síðastliðinn, var alþjóðadagur læsis. Af því tilefni var 30 bókakössum komið fyrir víða um Akureyri. Í kössunum voru ókeypis bækur sem fólk á öllum aldri gat tekið með sér heim til lestrar. Að lestri loknum mátti koma bókinni fyrir í sambærilegum bókakassa. Almenningur gat einnig sett sínar eigin bækur í bókakassana og aukið þannig enn á fjölbreytnina.

Sífellt bætast nýir titlar inn á tímarit.is. Nú þegar hafa verið myndaðir 652 titlar og þeim fjölgar jafnt og þétt. Hér á Amtsbókasafninu eru myndaðar um og yfir 1000 blaðsíður á dag. Um þessar mundir er verið að mynda hin ýmsu landsmálablöð og þess má geta að Dagur og Íslendingur eru komnir inn í safnið ásamt fleiri norðlenskum blöðum. Árið 2011 var Muninn myndaður í boði afmælisárganga í Menntaskólanum á Akureyri. Tímarit.is er hafsjór af fróðleik og leikir jafnt sem lærðir geta haft bæði gagn og gaman af því að skoða þetta sívaxandi safn.

Fjölskyldufólk leggur leið sína á safnið í auknum mæli nú í byrjun árs. Stofnun Barnabókaseturs, opnun sýningar um Yndislestur og mikil umfjöllun um lestur barna og unglinga hefur þar áhrif, án efa.

Þann 17. mars 2011 tókum við upp þá nýbreytni að senda lánþegum tilkynningu í tölvupósti um að komið væri að skilum á safnefni. Þessi nýbreytni hefur mælst vel fyrir og við hvetjum alla sem ekki hafa skráð netfang hjá okkur nú þegar að nota næstu ferð og yfirfara lánþegaupplýsingar sínar. Og endilega að láta okkur vita ef netfang breytist!

Daglega kemur nýtt efni í útlánadeildina, hvort sem um er að ræða bækur, blöð, tónlist, kvikmyndir, teiknimyndasögur eða annað. Pantanalistarnir eftir jólin eru orðnir mun styttri og því biðin eftir vinsælustu bókunum ekki jafn löng. Það ætti því að vera léttur leikur að rölta á Amtsbókasafnið og geta tekið með sér eitthvað nýtt efni. Til dæmis þetta:

Barnabókasetur var stofnað á Amtsbókasafninu á Akureyri, laugardaginn 4. febrúar. Barnabókasetrið verður rannsóknsetur um barnabækur, læsi og lestur barna. Að undirbúningi standa Háskólinn á Akureyri, Minjasafnið og Amtsbókasafnið. Að setrinu standa einnig Rit höfundasambandið, SÍUNG – samtök barna og unglingabókahöfunda, IBBY, Félag fagfólks á skólasöfnum og fleiri. Samhliða stofnun Barnabókaseturs var opnuð sýningin: Yndislestur æsku minnar. Hún samanstendur af myndum af þekktu fólki að lesa minnisstæða barnabók og hugleiðingum þeirra um bókina og hvers vegna hún var í uppáhaldi.

Laugardaginn 4. febrúar kl. 12.00 verður stofnað Barnabókasetur á vegum Háskólans á Akureyri, Minjasafnsins og Amtsbókasafnsins. Af því tilefni opnum við, Yndislestur æsku minnar - sýningu um eftirlætis barnabækur í máli og myndum. Allir velkomnir!

Tilboðsmyndir febrúarmánaðar hjá okkur verða Óskarsverðlaunamyndir, þ.e. þær myndir sem hafa unnið til Óskarsins. Tilefnið er hin stórkostlega umdeilda og árlega Óskarsverðlaunahátíð sem í ár verður haldin 26. febrúar nk. Þarna má finna snilldarverk eins og Inception, Citizen Kane, Casablanca, It Happened One Night, Brokeback Mountain, The Network, Lord of the Rings-trílógíuna, Godfather myndir númer 1 og 2, The Departed ... o.fl.