Fréttasafn

Atli Ásmundsson, aðalræðismaður Íslands í Winnipeg, heldur erindi í máli og myndum um kynni sín af áhugaverðu fólki af íslenskum ættum í Manitoba í Kanada. Einnig mun Almar Grímsson fv. forseti ÞFÍ kynna starfsemi og hlutverk Þjóðræknisfélagsins. Kvennakór Akureyrar mun syngja í upphafi fundarins. Aðgangur er ókeypis. Nánari upplýsingar er að finna á vefnum http://inl.is/

Landsnet hefur tilkynnt til athugunar Skipulagsstofnunar frummatsskýrslu um lagningu Blöndulínu 3 frá Blöndustöð til Akureyrar. Tillaga að ofangreindri framkvæmd og skýrsla um mat á umhverfisáhrifum hennar liggur frammi til kynningar frá 21. mars til 3. maí 2012 hér á Amtsbókasafninu á Akureyri.

Barnabókasetur stendur fyrir opnum fræðslufundum um barnabækur og lestur barna. Fyrsti fundurinn verður haldinn á Amtsbókasafninu fimmtudaginn 22. mars kl. 17:00. Brynhildur Þórarinsdóttir rithöfundur og dósent við Háskólann á Akureyri flytur erindið: Lestrarhestamennska er fjölskyldusport - Um mikilvægi lestraruppeldis Allir velkomnir! Kaffihúsið með heitt á könnunni....

Nú er verið að kynna starfsemi Amtsbókasafnsins markvisst fyrir börnum í skólum bæjarins. Fyrsti skólahópurinn kom til okkar úr Oddeyrarskóla og ekki hægt að segja annað en að heimsóknin hafi lukkast mjög vel. Góð mæting bæði barna og foreldra sem nutu þess að fara í skoðunarferð um leynda kima safnsins, leyta svara við spurningum bókavarðarins og velja sér bækur að vild.

Margir gleyma að taka bókamerkin sín úr bókunum þegar þeim er skilað. Við söfnum þessum merkjum saman og í gegnum tíðina hefur orðið til dágott safn af bókamerkjum í hinum ýmsum stærðum og gerðum. Nú eru bókamerkin til sýnis og ef þitt merki er á borðinu skaltu endilega taka það með þér heim!

Almennings- og skólabókasöfn landsins veita verðlaun hvert ár fyrir tvær barnabækur, aðra frumsamda og hina erlenda. 6-12 ára börn velja bækurnar og fer valið fram í grunnskólum og bókasöfnum um allt land á vormánuðum. Úrslit verða kynnt á aðalsafni Borgarbókasafns á sumardaginn fyrsta, 19. apríl. Hér á Akureyri má að skila atkvæðum fyrir 30. mars, á bókasöfn grunnskólanna eða á Amtsbókasafninu.