Fréttasafn

Guðný Stefánsdóttir hefur nú sett upp sýningu á tækifæriskortum sem hún hefur unnið sjálf á undanförnum árum. Sýningin stendur út október.

Við höfum nú opnað fyrir aðgang að vefbókasafninu Snöru - Snara er safn orðabóka og annarra uppflettirita sem viðskiptavinir okkar geta nýtt sé að vild hér innan veggja safnsins – Aðgangur er ókeypis og gildir bæði í okkar tölvum og í fartölvum gesta okkar. Snara hentar öllum hvort heldur sem er námsmönnum, skrifstofufólki, fræðimönnum, grúskurum, textagerðafólki, þýðendum eða öðrum. Snara geymir yfir 2 milljónir uppflettiorða í 22 orðabókum og uppflettiritum þannig að það er um að gera að prófa! Slóðin er www.snara.is

Margt verður til skemmtunar: - Verðlaun í happdrættinu, Skoppað á bókasafnið - Myndataka – eins og Hr. Skoppi - Málað og litað á færibandið - Kynning á nýjum bókum - Búningahornið verður á sínum stað - Rím á vegg - Hvað rímar við skoppar? - Rím um bækur, t.d. bók er betri en kók! - Hoppað í París - Veitingar - Við hvetjum alla krakka sem tóku þátt í Skoppaðu á bókasafnið að koma og hafa gaman saman! Hlökkum til að sjá ykkur :-) Herdís Anna, barnabókavörður og starfsfólk Amtsbókasafnsins.

Fyrsta sögustund haustsins er fimmtudaginn 20.september, kl. 16:15. Við lesum bókina, Litla lundapysjan eftir Hilmar Högnason. Sögupokinn góði verður á sínum stað og svo gerum við bókamerki. Hlakka til að sjá ykkur öll :-) Herdís Anna, barnabókavörður

Amtsbókasafnið og Hof hafa nú sett upp bókahillu sem notuð verður til að sýna bækur af ýmsu tagi í vetur. Amtsbókasafnið valdi í maí 2011 alls 100 íslenskar bækur sem allir verða að lesa. Núna hefur þeim verið stillt upp á nýrri bókahillu í Hofi og munu þær standa þar út september.

Vikuna 3.-7. september verður ,,Bók í bandi” á Amtsbókasafninu. Tilefnið er alþjóðadagur læsis 8. september. Við tökum fram nokkrar bækur og hengjum upp, gestum okkar til fróðleiks og gleði. Bækurnar má lesa á staðnum eða fá lánaðar heim og við hvetjum lánþegana til að velja bækur og setja í bandið í stað þeirra sem teknar eru að láni. Það er lítill vandi að finna bók í bandi :-)

Í tilefni af 150 ára afmælis Akureyrarbæjar hefur bókaforlagið Uppheimar fært Amtsbókasafninu höfðinglega gjöf sem samanstendur af bókum sem starfsmenn safnsins fengu að velja úr útgáfu Uppheima. Aðstandendur Uppheima eru að norðan og bera hlýjar taugar til Akureyrar. Þeim fannst því tilvalið að gleðja gömlu góðu Akureyri og íbúa hennar með því að gefa Amtbókasafninu úrval góðra bóka. Við kunnum þeim góðar þakkir fyrir og lánþegar okkar munu njóta góðs af.