Fréttir

Nú hefur verið unnið úr tölfræði fyrir síðastliðið ár og við birtum hér helstu niðurstöður, okkur öllum til gagns og gamans. Áhugaverðast má kannski segja að gestir okkar árið 2012 voru 113.219 talsins og má þar merkja örlitla fækkun milli ára eða 4%. Útlán voru samtals 201.327 eintök þar af var meirihlutinn bækur. Hér má einnig sjá nokkra fækkun eða um 7%. Þessar tölur eru í samræmi við sambærilegar tölur frá öðrum almenningsbókasöfnum bæði hérlendis og erlendis.

Steinunn Sigurðardóttir fjallar um skáldsögur sínar Jójó og Fyrir Lísu í ljósi nýrra afhjúpana um barnaníð á Íslandi, í Hofi fimmtudaginn 14. mars kl 17:00. Um leið og Steinunn Sigurðardóttir fer yfir sköpunarsögu skáldsaganna tveggja, kemur hún einnig inn á tengslin við íslenskan veruleika og nýlegar afhjúpanir um kynferðisbrot, gegn drengjum sérstaklega. Hvaða erindi eiga tveir Berlínarbúar, þýskur geislalæknir og franskur róni, sem aðalpersónur í íslenska skáldsögu? Hvernig datt Steinunni Sigurðardóttur í hug - eftir að hafa sent frá sér Reykjavíkurskáldsögur með ívafi ljóða eins og Tímaþjófinn og Sólskinshest, íslenska ferðasögu fjögurra kvenna, eins og Hjartastað - að fjalla um sameiginlega lífsreynslu og vináttu Martins læknis og Martins róna í Berlín? En þeir reynast vera þjáningarbræður sem glíma báðir við afleiðingar af því að hafa verið gert mein þegar þeir voru börn.

Við viljum benda viðskiptavinum okkar á að nú er hægt að leita í safnkosti Amtsbókasafnsins beint hér á heimasíðunni. Hægt er að slá inn t.d. bókartitil eða höfund og þá birtast niðurstöður yfir það sem til er hjá okkur - Leitið og þér munuð finna :-)

Í mars er þemað í bókahillunni ; bækur og kvikmyndir. Alveg frá upphafi kvikmyndagerðar hafa myndir verið byggðar á frægum skáldsögum. Hér eru mörg dæmi um það en úrvalið er fjarri því að vera tæmandi. Höfundar eins og J.R.R. Tolkien, J.K. Rowling, Stephen King, Agatha Cristie, Astrid Lindgren, Nick Hornby, Umberto Eco og Jane Austen hafa sett svip sinn á kvikmyndasöguna ásamt miklum fjölda annarra rithöfunda.

Allar bækur sem komu út fyrir jólin eru ekki lengur í skammtímaláni. Lánstími á þeim er nú 30 dagar. Margar þeirra staldra nú örlítið lengur við í hillunum hjá okkur og því auknar líkur á að næla sér í nýlega bók. En jólabækurnar eru ekki einu nýju bækurnar og alltaf bætast spennandi tiltlar í safnið. Allar nýjar bækur fara beint í útlán og er ávallt stillt upp í hillurnar næst afgreiðslunni þannig að auðvelt er að fylgjast með!

Við viljum vekja athygli á nýjum leiðbeiningum á leiðbeiningasíðunni á leitir.is. Leiðbeiningarnar sem hafa bæst við eru: • Leitarmöguleikar • Rafræn hilla • Vista leit • Þrengja leitarniðurstöður Við hvetjum lánþega okkar til að fara í leitir og prófa þjónustuna sem þar er í boði.

Við á Amtsbókasafninu höfum nú gert bókamerki með bros- og fýlukarli. Þau er að finna við afgreiðsluna, hjá sjálfsafgreiðsluvélum, í unglingadeildinni, barnadeildinni og í afgreiðslunni á 2. hæð. Hugmyndin er sú að lánþegar gefi bókum bros- eða fýlukarl eftir því hvernig þeim líkar bókin sem þeir voru að klára og við vonum að þetta hafi í för með sér að um allt hús verði bækur með svona bókamerkjum. Verða mörg bókamerki í einni bók? Eða munu lánþegar skiptast á að nota bros- og fýlukarl? Kemur í ljós, en okkur þætti afar vænt um að sjá ykkur gera þetta - og um leið vekur þetta athygli á bókum og kátínu í bland við forvitni hjá ykkur.

Í febrúar er þemað; Tónlistarbækur. Bækur um tónlist, hljóðfæri, hljómsveitir, tónlistarmenn og ýmislegt fleira sem viðkemur tónlist. Hér má finna ævisögur og umfjallanir um tónlistarfólk sem komið hafa út á íslensku. Úrvalið er engan veginn tæmandi en gefur góða hugmynd um hve fjölþætt umfjöllun um tónlist getur verið.