Fréttir

Í september er þema bókahillunnar í Hofi fólk og menning. Á Akureyri býr fólk sem á uppruna sinn víða um heim. Menningin er margbrotin og tungumálin eru mörg. Á Amtsbókasafninu eru til bækur um allt milli himins og jarðar og á mörgum tungumálum. Fyrir utan íslensku er mest til á enskri tungu en einnig er nokkuð úrval bóka á öðrum Evrópumálum auk orðabóka. Fjöldinn allur af skáldsögum er af erlendum uppruna og hægt er að fá yfir 10000 bækur sem þýddar hafa verið úr hinum ýmsu tungumálum. Kvikmyndasafnið okkar er einnig afar fjölmenningarlegt og við bjóðum myndir frá yfir 20 þjóðlöndum sem síðan bjóða tal eða texta á enn fleiri málum. Amtsbókasafnið vill hafa eitthvað fyrir alla og öllum er velkomið að koma með tillögur að efniskaupum fyrir safnið. Tölum saman!

Amtsbókasafnið laugardaginn 31. ágúst kl. 13:00-19:00 13:00-17:00 - Álfabækur – síðasti sýningardagur. 15:00 - Hugmynd eða veruleiki. Listamaðurinn spjallar um verk sín og segir frá því hvernig hægt er að koma stóru bókasafni niður í einn skókassa. (Undan hælaháum!) 17:00-19:00 - Frátekin verk afhent eigendum sínum. (Þeir sem keypt hafa verk geta sótt þau á þessum tíma)

Litla búðin okkar í afgreiðslunni inniheldur margar gersemar. Þeirra á meðal eru þessar yndislegu og sívinsælu múmínkönnur.

Óhætt er að segja að sýning Guðlaugs Arasonar á Álfabókum hafi slegið í gegn. Álfabækurnar heilla bæði stóra og smáa og í þeim má endalaust finna ný og óvænt atriði. Margar myndir eru nú þegar seldar en Álfabækurnar munu gleðja okkur áfram því sýningin stendur út ágústmánuð.

Amtsbókaormurinn hefur vaxið og dafnað svo um munar og nú er svo komið að hann er orðinn illmeðfærilegur. Því höfum við ákveðið að setja hann til hliðar um sinn, gefa honum haus og hala og stilla honum upp í haust. Í hans stað er kominn vísir að nýjum Amtsbókaormi og öllum velkomið að grípa í prjónana :-)

Elfbooks – Elfenbücher – Elfebøger – Livres des elfes - Opnun föstudaginn 28. júní kl. 12:00 - Allir hjartanlega velkomnir! Amtsbókasafninu er heiður af því að verða fyrst til að setja upp sýningu á myndverkum Guðlaugs Arasonar. Sýningin samanstendur af litlum bókaskápum fullum af örsmáum, þekktum, íslenskum sem erlendum, bókum. Hver bókaskápur er heimur útaf fyrir sig og þar búa bæði skáld og ýmsar kynjaverur. Bækurnar kallar Guðlaugur álfabækur og segja má að hér sé um nýja tegund myndlistar að ræða. Sýningin stendur yfir 28. júní til 31. ágúst - Opið alla virka daga kl. 10:00-19:00