Fréttasafn

Bæjarstjórn hefur gert það að einu af meginmarkmiðum sínum að Akureyri verði kolefnishlutlaust sveitarfélag. Nú þegar er Akureyri einn umhverfisvænasti bær landsins og hefur ýmislegt verið gert til að stuðla að grænu og vænu samfélagi. Stefna bæjarstjórnar er að Akureyri verði orðin kolefnishlutlaus og helst gott betur en það árið 2030.

Þann 6. september síðastliðinn samþykkti bæjarstjórn endurskoðun á mannauðsstefnu Akureyrarbæjar með 11 samhljóða atkvæðum. Helsta breyting í endurskoðuninni er að þjónustustefna og velferðarstefna starfsmanna hafa nú verið sameinaðar mannauðsstefnunni, auk þess hefur köflum verið endurraðað og nokkrir þeirra styttir. Skilgreindir voru mælikvarðar sem notaðir verða til að veita stefnunni eftirfylgni. Tólf manna starfshópur vann að endurskoðuninni og óskaði eftir umsögnum frá stéttarfélögum, trúnaðarmönnum, fagnefndum og starfsfólki bæjarins. Gagnlegar umsagnir bárust sem nýttar voru til að bæta mannauðsstefnuna ennfrekar.

Menningarfélag Akureyrar kynnir Handbendi - Brúðuleikhús, og hið frumsamda brúðuverk Engi, sem ætlað er börnum þriggja ára og eldri. Sagan er sögð með frumlegum, handgerðum leikbrúðum og sérsaminni tónlist eftir tónskáldið og söngvarann Paul Mosley. Höfundur verksins er Greta Clough. ENGI er sýnt í Samkomuhúsinu 24. september. Er ekki tilvalið að hefja menningarveturinn með börnunum á fallegu brúðuleikhúsi ?

Í gær hófst alþjóðleg ráðstefna um þjónandi leiðsögn (Gentle Teaching) í Hofi á Akureyri. Rétt um 300 manns taka þátt í ráðstefnunni sem stendur yfir í þrjá daga. Ráðstefna hófst með ávarpi bæjarstjórans á Akureyri, Eiríks Björns Björgvinssonar, og síðan setningarávarpi Tim Jones forseta Gentle Teaching International samtakanna.

S.l miðvikudag fór fram hið árlega NORAK starfsmannagolfmót Akureyrarbæjar í fjórða skiptið. Alls voru 50 skráðir til leiks sem er met þátttaka í mótinu sem fór fram við einstakri blíðu á Golfvellinum að Jaðri.

Í dag stöndum við frammi fyrir stöðugri þekkingarleit þar sem allt breytist hratt. Þessi þekkingarleit getur tekið á sig margar myndir en ein þeirra er viljinn til þess að þroska sig áfram í starfi, auka færni sína og möguleika á vinnumarkaði. Ein leið að því marki er að sækja reglulega námskeið og þjálfun sem styrkir og eflir færni okkar á ólíkum sviðum sem nýtist í starfi. Fræðslusetrið Starfsmennt býður opinberum starfsmönnum upp á starfstengda símenntun og veitir stofnunum heildstæða þjónustu á sviði starfsþróunar.

Fimmtudaginn 15. september kl. 11:00 boða Jafnréttisstofa og Jafnréttisráð til ráðstefnu á Akureyri. Tilefnið er að fjörutíu ár eru liðin frá því fyrstu jafnréttislögin voru sett á Íslandi og fimm manna Jafnréttisráð var skipað til að annast framkvæmd laganna. Ráðstefnan er öllum opin.

Árshlutareikningur fyrir A-hluta Akureyrarbæjar fyrir tímabilið 1. janúar til 30. júní 2016 var lagður fram í bæjarráði í dag. Árshlutauppgjörið er óendurskoðað. Rekstrarniðurstaða A-hluta á fyrri hluta ársins var neikvæð um 155,3 milljónir króna en áætlun gerði ráð fyrir að rekstarhalli yrði 380 milljónir króna á tímabilinu. Afkoman er því nokkru betri en áætlun gerði ráð fyrir.