Silfurtunglið býður vinnustöðum Akureyrarbæjar hópafslátt á sýninguna: Ég var einu sinni frægur. Og býður miðann á 2000 krónur fyrir stóra hópa. Stórleikararnir Þráinn Karlsson, Gestur Einar og Alli Bergdal leika sig sjálfa; gamla bitra geðilla leikara sem halda að þeir séu virtir, dáðir og sívinsælir. Sýningin gerist á Kanarí og fjallar um ferð eldri borgara frá Akureyri til Kanarí sem fer algjörlega úr böndunum. Leikararnir nota sögur úr eigin reynslu, Gestur Einar þolir ekki Gogga úr Stellu í Orlofi, Alli Bergdal þolir ekki Skralla trúð og Þráinn Karlsson þolir ekki þegar fólk segir við hann; mikið líturðu vel út!

Í ljósi umræðna sem skapast hafa í kjölfar nýrrar könnunar BSRB, sem sýnir að kynbundinn launamunur sé síður en svo í rénun, skal áréttað að slíkan launamun hefur ekki verið að finna hjá Akureyrarbæ á undanförnum árum eins og leitt var í ljós með rannsókn RHA árið 2007.

Bleikur föstudagur! Október er mánuður bleiku slaufunnar og árveknis- og fjáröflunarátaks Krabbameinsfélags Íslands gegn krabbameinum hjá konum. Af því tilefni biður Krabbameinsfélag Íslands alla landsmenn um að klæðast einhverju bleiku föstudaginn 12. október eða hafa bleikan lit í fyrirrúmi þann dag. Með því sýnum við samstöðu í baráttunni.

Þessi spjalltónleikaröð Jóns Ólafssonar hefur gengið fyrir fullu húsi í Salnum síðastliðna þrjá vetur og nú gefst Norðanmönnum tækifæri til að kynna sér herlegheitin. Sjálfur Björgvin Halldórsson er gestur Jóns þetta kvöldið en hann hefur verið einn okkar fremsti söngvari um árabil. Hér munu kraftballöður og kómískar sögur verða altumlykjandi því gestgjafinn kann manna best að ná mönnum á flug. Með þeim verða Jón Elvar Hafsteinsson á gítar og Friðrik Sturluson á bassa. Boðið er upp á sérstök kjör til starfsmannfélaga og hópa á tónleikana, 600 kr afsláttur af almennu miðaverði sem er 3.900 kr. Nánari upplýsingar og bókanir í miðasölu Hofs s. 450 1000 og midasala@menningarhus.is.

Dagana 10. og 18. október nk. verður boðið upp á þriggja tíma fræðslu fyrir nýtt starfsfólk hjá Akureyrarbæ. Þann 10. október verður námskeiðið haldin frá kl. 13-16 og þann 18. október frá kl. 9-12. Samkvæmt mannauðsstefnu Akureyrarbæjar á allt nýtt fastráðið starfsfólk að fara á nýliðanámskeið þar sem það er frætt um starfsemi og markmið Akureyrarbæjar ásamt réttindum sínum og skyldum. Markmiðið með fræðslunni er að nýtt starfsfólk kynnist mismunandi starfsemi hjá bænum og fái innsýn inn í hin ýmsu mál sem snerta starfsmenn Akureyrarbæjar, bæði beint og óbeint. Fastráðið starfsfólk sem unnið hefur skemur en eitt ár hjá Akureyrarbæ getur skráð sig á nýliðafræðsluna á starfsmannavef Akureyrarbæjar. Mikilvægt er þó að gera slíkt í samráði við yfirmann.