Fréttir

Það er ekkert launungarmál að þessi tími ársins er sá blómlegasti í íslenskri bókaútgáfu. Stóru kanónurnar gefa þá oft út nýjar bækur og fram á ritvöllinn þeysast stundum nýir höfundar. Daglega bætast við nýjar bækur hjá Amtsbókasafninu. Þetta eru skáldsögur, fræðibækur, barnabækur ... þetta eru bækur af öllum stærðum og gerðum.

Eins og allir safngestir okkar vita, þá eru hjá okkur stöðug tilboð í mynddiskunum. Nýtt tilboð er komið fyrir nóvember-mánuð og þar er hálfgerð tilraun á ferðinni. Við köllum tilboðið „Allskonar myndir“ en það er einn starfsmaður sem sér um að velja myndirnar. Ef viðtökur verða góðar við þessari aðferð á að velja tilboðsmyndir, þá er næsta víst (eins og Bjarni Fel segir alltaf) að annar starfsmaður verði fenginn til að velja myndir fyrir einhvern mánuð í framtíðinni.

Íslensk tónlist er í miklum blóma. Við og við bætast nýir geisladiskar í tónlistardeild Amtsbókasafnsins og í dag bættust við tíu. Þarna má finna tónlist eftir Ólaf Gauk, fyrsta sólógeisladisk Felix Bergssonar, nýjustu afurð Ham, nýjan disk með Megasi og Senuþjófunum, og einn heitasta diskinn í dag: "My head is an animal" með Of Monsters and Men.

Sýning um ævi og ritverk Irène Némirovsky. -- Miðvikudaginn 26. október kl. 17:00 verður sýning um ævi og ritverk fransk-úkraínsku skáldkonunnar Irène Némirovsky (1903-1942) sem ber yfirskriftina „Ég skrifa á brennheitu hrauni...“ opnuð í Amtsbókasafninu á Akureyri.

Myndband þetta var tekið á nýlegri ráðstefnu í Salzburg. Þetta er tekið af netinu og er ekki á vegum Amtsbókasafnsins á Akureyri. Engu að síður er gaman að sjá fólk (þátttakendur á þessari ráðstefnu) velta fyrir sér hvernig bókasöfn og söfn líti út eftir níu ár.

Við á Amtsbókasafninu höfum gert nokkur myndbönd í gegnum tíðina. Þessi hér voru gerð fyrr á árinu og eiga alveg jafnvel við núna. Hægt er að fara á Youtube og slá inn "Amtsbókasafnið" í leitargluggann, þá koma upp nokkur myndbönd sem fróðlegt er að skoða (reglulega).

Ofurhetjur á borð við Ofurmennið, Kóngulóarmanninn og Leðurblökumanninn, hafa lengi verið vinsælar í formi teiknimyndasagna og kvikmynda. Ef eitthvað er, þá hefur áhuginn aukist síðustu ár og má merkja það meðal annars í stórskemmtilegri markaðssetningu á The Avengers myndinni sem kemur í kvikmyndahús á næsta ári.

Kl. 14:00 í dag, fimmtudaginn 20. október 2011, opnaði bæjarstjóri formlega nýjar heimasíður bæjarins í bæjarstjórnarsal Ráðhússins. Amtsbókasafnið á Akureyri er hluti af þessum pakka og hefur verið með sama vefumsjónarkerfi og Akureyrarbær í mörg ár. Engin breyting verður á því núna þegar vefumsjónarkerfið Moya verður tekið formlega í notkun í stað Eplica.