Sú þrá að þekkja og nema - sýning um ævi og störf Jónasar Jónassonar frá Hrafnagili
Í anddyri Amtsbókasafnsins á Akureyri má nú sjá sýninguna Sú þrá að þekkja og nema, um ævi og störf sr. Jónasar Jónassonar frá Hrafnagili. Sýningin er haldin í tilefni af því að í ár eru liðin 150 ár frá fæðingu Jónasar.
(1856–1918)
Jónas fæddist á Úlfá í Eyjafjarðardal, sonur hjónanna Guðríðar Jónasdóttur og Jónasar Jónssonar. Hann lauk embættisprófi 1883, tók prestsvígslu, og þjónaði í Grundarþingum í Eyjafirði í um 25 ár. Seinna starfaði Jónas sem kennari við Gagnfræðaskólann á Akureyri.
Kona Jónasar var Þórunn Stefánsdóttir Ottesen. Börn þeirra átta fæddust á árunum 1885-1900, en fjögur létust mjög ung úr berklum með fárra ára millibili, og einnig þrjú fósturbörn þeirra hjóna. Börnin sem upp komust tóku upp ættarnafnið Rafnar, en þau voru Oddur, forstöðumaður í Kaupmannahöfn, Jónas læknir, Friðrik prestur og Stefán Sigurður skrifstofustjóri S.Í.S. í Reykjavík.
Sr. Jónas Jónasson stundaði ritstörf og stóð í bréfaskriftum hérlendis og erlendis. Árið 1915 stóð hann fyrir heimildasöfnun um þjóðhætti, þjóðsiði, trú og venjur hér á landi. Afrakstur söfnunarinnar kom út í bókinni Íslenskir þjóðhættir sem fyrst var gefin út árið 1934.
Afmælis sr. Jónasar verður minnst bæði norðan og sunnan heiða í sumar og fram á haust.
