Tveir nýir Grímseyingar litu dagsins ljós þann 19. maí síðastliðinn og jókst því fjöldi eyjaskeggja um 3%. Þau Júlía Ósk Ólafsdóttir og Kristófer Sindri Pétursson eignuðust sitt fyrsta barn sem var 15 marka drengur og síðar sama dag eignuðust þau Rannveig Vilhjálmsdóttir og Bjarni Gylfason 14 marka stúlku, sem er þeirra fimmta barn.

Fiskveiðar og útgerð eru forsenda byggðar í Grímsey og því mikilvægast að styrkja þessa þætti, ásamt öðrum þeim atvinnugreinum sem þegar eru í eyjunni. Þetta eru meginskilaboð tveggja daga íbúaþings sem haldið var dagana 1. og 2. maí, sem nær allir fullorðnir íbúar eyjarinnar sóttu og er það metþátttaka. Grunnskólinn var einnig heimsóttur og rætt var við nemendur.

Síðastliðið sumar ákvað Byggðastofnun að Grímsey yrði eitt þriggja nýrra byggðarlaga sem taka þátt í verkefninu "Brothættar byggðir" en sótt var um fyrir tólf byggðarlög. Fyrir náði verkefnið til fjögurra byggðarlaga, þannig að nú eru þau sjö talsins.