Fréttasafn

Vakin er athygli starfsfólks á upplýsingum um verklag í tengslum við áreitni á vinnustað og hvert starfsfólk getur leitað ráðgjafar upplifi það slíkar aðstæður á vinnustað eða verður vitni að þeim. Upplýsingar þess efnis er að finna undir efnisflokknum Starfsmannahandbók > Einelti - áreitni - ofbeldi. Þá er það ítrekað að allt starfsfólk Akureyrarbæjar á rétt á því að komið sé fram við það af virðingu og að það hafi tækifæri til að sinna störfum sínum án þess að eiga á hættu einelti, kynferðislega áreitni, kynbundna áreitni eða annarskonar ofbeldi.

Dagana 25. nóv. til 10. des. verður 16 daga átak gegn kynbundnu ofbeldi sem felst í að draga ofbeldið fram í dagsljósið sem mannréttindabrot. Upphafsdagur átaksins 25. nóvember er alþjóðlegur baráttudagur gegn ofbeldi gegn konum. Lokadagur átaksins 10. desember er alþjóðlegi mannréttindadagurinn. Dagsetningarnar tengja saman á táknrænan hátt kynbundið ofbeldi og mannréttindi. Allar nánari upplýsingar um átakið má finna HÉR.

Þriðjudaginn 21. nóvember í Samkomusal Hlíðar kl. 13:00-15:00 verða fróðleg erindi um það sem er að gerast á Öldrunarheimili Akureyrar. Markmiðið er að upplýsa starfsfólk, íbúa, aðstandendur og gesti um þróun og nýjungar sem unnið hefur verið að á heimilinu.

Í vetur eru fjórir nemendur í skólanum, fámennt en góðmennt, og allir í eldri deild. Það hefur þau áhrif að hægt er að haga kennslunni á nýjan hátt. Skipulagið sem unnið er eftir er þannig að bókfögin; enska, danska, stærðfræði og íslenska sameinast að miklu leyti í svokallaðar vinnustundir sem ná yfir meirihluta morgnanna, þó eru stýrðir tímar á mánudagsmorgnum og áætlunartími í vikulok svo nemendur og kennarar hafi yfirsýn yfir vikuna. Þá eru nemendur með áætlanir í þessum fögum og vinna þær eftir hentugleika, svo fremi sem þau skili unninni áætlun í vikulok. Þetta er heilmikið frelsi, þar sem nemendur eru ekki skikkaðir í ákveðið fag á ákveðnum tíma og kennir þeim þar að auki að taka ábyrgð á eigin námi. Einn nemandi í 5. bekk bjó til málshátt af þessu tilefni: "Leiðinlegt er betur unnið fyrst". Seinnipart skóladagsins eru svo samfélagsgreinar og list- og verkgreinar, sem eru kenndar í lotum, auk íþrótta þrisvar í viku. Einnig má segja frá því að Grímseyjarskóli hefur tekið upp virka flokkun. Eru komnar sérstakar ruslatunnur fyrir pappír, fernur og plast auk þess sem tilfallandi ál er tekið frá. Lífrænn úrgangur á það svo til að enda í goggi fiðurfénaðs eyjarinnar. Í sumar var svo settur upp ærslabelgur í Grímsey og eru allir hæstánægðir með hann. Ærslabelgurinn er staðsettur sunnan við skólann og kemur sennilega til með að verða vinsælasta leiktæki barnanna, já og þeirra fullorðnu. Í tilefni 50 ára afmælis Grímseyjarskóla í húsnæðinu Múla, sem haldið var upp á síðasta vor, fékk skólinn gjöf frá fræðslusviði Akureyrarbæjar. Í pakkanum var forláta nýr Ipad sem kemur sér aldeilis vel og Osmo kennsluleikur í upplýsingatækni. (Skóla-akur, vefrit um skólamál, 8. tbl. 11. árgangur 16. nóvember 2017)

Sterkari starfsmaður er yfirskrift þriggja anna námsleiðar sem hefst í janúar 2018 fyrir starfsmenn grunnskóla Akureyrarbæjar, aðra en kennara. Símenntunarmiðstöð Eyjafjarðar annast skipulagningu námsins í samstarfi við fræðslusvið Akureyrarbæjar og grunnskóla sveitarfélagsins og ber ábyrgð á því í samræmi við hlutverk og verkefni fræðslu- og símenntunarstöðva. Á fyrstu mánuðum þessa árs voru greindar þarfir fyrir fræðslu starfsmanna grunnskóla bæjarins annarra en kennara og niðurstöður þeirrar vinnu hafðar að leiðarljósi við skipulag námsins Sterkari starfsmaður, sem er ein af námsleiðum Fræðslumiðstöðvar atvinnulífsins. Í náminu verður annars vegar lögð áhersla á upplýsingatækni og hins vegar samskipti og sjálfstyrkingu. Hluti af verkefninu felst í að náms- og starfsráðgjafi frá SÍMEY býður starfsfólki grunnskólanna upp á ráðgjöf um Sterkari starfsmann og mögulegt viðbótarnám Frétt um samninginn, og ofangreindur texti, birtist á heimasíðu SÍMEY 26. október síðastliðinn og lesa má fréttina í heild sinni með að smella HÉR.

Þann 25.október var undirritaður samningur milli búsetusviðs Akureyrarbæjar og SÍMEY sem kveður á um að SÍMEY mun greina þörf á fræðslu starfsmanna búsetusviðs með það að markmiði að vinna nýja fræðsluáætlun fyrir þá. Að samningnum kemur einnig Sveitamennt - starfsmenntunarsjóður starfsmanna sveitarfélaga á landsbyggðinni innan aðildarfélaga Starfsgreinasambands Íslands. Af hálfu SÍMEY skrifaði Valgeir B. Magnússon, framkvæmdastjóri SíMEY, undir samninginn en af hálfu búsetusviðs Akureyrarbæjar Jón Hrói Finnsson, sviðsstjóri. Samningurinn er liður í framhaldi á nokkurra ára samstarfi SÍMEY og búsetusviðs Akureyrarbæjar um fræðslumál starfsmanna þess. Fyrri fræðsluáætlun verður tekin upp og endurgerð í takt við breyttar áherslur og starfssvið starfsmanna. Þarfagreiningin verður unnin í nánu samstarfi ráðgjafa SÍMEY – Ingunnar Helgu Bjarnadóttur og Kristjáns Sturlusonar – og stýrihóps stjórnenda og starfsmanna búsetusviðs. Í það heila eru þeir starfsmenn búsetusviðs Akureyrarbæjar sem um ræðir á 14 vinnustöðum og heildarfjöldi þeirra er 290. Þar af eru um 80% þeirra félagsmenn Einingar-Iðju en aðrir eru félagsmenn Bandalags háskólamanna og njóta stuðnings Starfsþróunarseturs háskólamanna. Þarfagreiningin verður unnin á tímabilinu frá október 2017 til janúar 2018 og sem fyrr segir hefur hún það að markmiði að undirbúa gerð nýrrar fræðsluáætlunar sem verður unnin í framhaldinu.

Hulda Sif Hermannsdóttir hefur verið ráðin aðstoðarmaður Eiríks Björns Björgvinssonar bæjarstjóra og leysir hún af hólmi Katrínu Björgu Ríkarðsdóttur sem tekur við starfi framkvæmdastjóra Jafnréttisstofu. Hulda Sif hefur starfað á Akureyrarstofu sem verkefnastjóri viðburða- og menningarmála frá árinu 2007. Hulda Sif er með BA próf í þýsku og nám í verkefnastjórnun og leiðtogaþjálfun. Snertifletir Huldu Sifjar á Akureyrarstofu hafa verið auk menningarmála og viðburðastjórnunar, mál tengd ferðaþjónustu og markaðs- og kynningarmálum. Hulda Sif starfaði áður hjá RÚV við dagskrárgerð og fréttamennsku.